Лаврентьевская летопись.

В лето 6739 (1231)
… Того же лета ходи князь Ярослав ратью к Чернигову на князя великого Михаила и пожже Шернеск и стояв под Можаиском възвратися в своя си без мира а города не взяша. ПСРЛ. Т. I. М. 2001. С. 511.

 

Новгородская первая летопись старшего и младшего изводов.

В лето 6739 (1231).
… Того же лета ходи Ярослав на Чернигов ратью и наволость Черниговьскую с новгородци и с всею властью своею, на князя Михаила, и пожже Шернеск; и стоав под Мосаиском, въспятися назад, истрати обилья много. ПСРЛ. Т. III. М. 2000. С. 280.
В лето 6907 (1399)
… Прииха князь Андреи Дмитриевич, брат князя великаго Васильев, в Новъгород, на память святого отца Осифа архиепископа селуньскаго, и пребы в Новегороде от Володимерова дни до Семенова дни летопроводца, и поиха из Новагорода, а владыка Иоан и посадникы и бояре даша князю честь велику. ПСРЛ. Т. III. М. 2000. С. 394.
В лето 6921 (1413)
… Того же лета от Можаиска града за 10 веръст, в отчины князя Андрея Дмитриевича, от иконы пресвятыя Богородица явилося жалованиа и прощениа людем много: слепым, хромым, раслабленым, глухым и немым, и несть мощно сказати или исчести их, ум человечь не можеть изрещи, колико человеколюбие божие и какова милость на людех. ПСРЛ. Т. XLII. СПб. 2002. С. 174.

В лето 6953 (1445)
… Тои же зиме князь великыи Василеи насла Тотар два царевица на литовьскыи городы, на Вязму и на Брянеск, и на иныи городы безъвестно, и много потратиша, и в полон сведоша и пожьгоша, мало и не до Смоленьска. И. то слышав князь Литовьскыи Казимир, и посла своих панов и рать свою на Можаеск и на иныи городы, 5 городов взя, и плени земли много и повоева, и христьяньству погибель велика бысть. ПСРЛ. Т. III. М. 2000. С. 424.
Сице родословятся велицеи княз русьстии.
Родословие тех же князеи.
… Сынове Дмитреевы:… Андреи,
… ПСРЛ. Т. III. М. 2000. С. 466.
А се имена всем градом рускым, далним и ближним.
А се Литовьскыи: … Масалеск ….
А. се Залескии: … Можаеск …
ПСРЛ. Т. III. М. 2000. С. 476-477.

 

Новгородская четвертая летопись.

В лето 6739 (1231)
… Тогда ходи Ярослав на Чернигов ратью и на волость Черниговъскоую с Новгородци и с всею властью своею, на Михаила, и пожже Шернеск; и стояв под Можаиском, въспятися опять, истрати обилиа много. Туто же под городом застрелиша Олдана подвоискаго и без мира отъидоша. ПСРЛ. Т. IV. Ч. 1 М. 2000. С. 212.
В лето 6849 (1341)
… А ко Можаискоу пришед рать Литовьскаа, града не взяша, а посад пожгоша. ПСРЛ. Т. IV. Ч. 1 М. 2000. С. 271.
В лето 6890 (1382)
… Елма же царь распусти силоу Тотарьскоую по земли Рускои воевати княжение Роуское великое, ови изьшедше к Володимерю, и много людьи посекоша и в полон поведоша, а нии полци ходиша к Звенигороду и к Юрьеву, а инии к Волокоу и к Мужаиску, а дроузии к Дмитриевоу; а иноую рать послал в град Переяславль; они же его взяша и огн[е]м пожгоша, а Переаславци выбегоша вон из града, а град повергоша, по озеру в соудех, и тамо избыша. ПСРЛ. Т. IV. Ч. 1 М. 2000. С. 337.
В лето 6894 (1386)
… Тои же зимы, в Филипов пост, пред Рожеством Христовым, князь великии Дмитрии Иванович сбра воя многи с всими князи Рускими и с братом своим Володимером Андреевичем; а с ними были рати: Московьскаа, Коломеньская, Звенигородчкаа, Можаискаа, Во[ло]чкаа, Ржевьскаа, Серпоховьскаа, Боровьскаа, Дмитровьска, Переяславьскаа, Володимерьскаа, Юрьевъскаа, Моуромьскаа, Мещерьскаа, Стародоубьскаа, Суздальскаа, Городецкаа, Нижьняго Новагорода, Костромская, Оуглечкаа, Ростовьскаа, Ярославьскаа, Можаискаа, Моложеская, Галичкаа, Бежичкаа, Белозерьскаа, Вологочкаа, Оустижьискаа, Новоторжьскаа; поиде ратью к Новугородоу, а волости Новгородцкии воююще и жгоуще, дрьжа гнев на Новъгород про Волжан и про княщины. ПСРЛ. Т. IV. Ч. 1 М. 2000. С. 344-345.
В лето 6897 (1389)
… И раздавал же есть комуждо сыном своим, и городы свои в отчиноу им предасть по чясти, на чем им княжити и жити, по жребью раздели им землю: второму сыну своему, князю Юрью, дал есть Звенигород с всеми волостьми и с всеми пошлинами, такоже и Галичь, яже николи же бывало княжение Галичьское, с всеми волостьми и с всеми пошлинами; третиему же сыну своему, князю Андрею, дал есть город Можаеск да другыи город Белоозеро и с всеми пошлинами, се же Белоозеро неколи бывало княжение Белоозерьское; чевертому же сыну своемоу, князю Петру, дал есть город Дмитров, с всеми волостьми и с всеми пошлинами. ПСРЛ. Т. IV. Ч. 1 М. 2000. С. 358.
В лето 6907 (1399).
Приеха в Новъгород князь Андреи, брат князя великаго Василья Дмитриевича. ПСРЛ. Т. IV. Ч. 1 М. 2000. С. 383.
В лето 6921 (1413)
… Того же лета от Можаиска града за 10 верст, во отчине Андреа князя Дмитриевича, от иконы пресвятыя Богородица явися жалование и прощениа людем многа, слепым и хромым, раслабленым, глухим и немым, но несть мощно сказати или исчести их: оум чловечь не можеть изрещи, колико чловеколюбие Божие и какова милость на людех. ПСРЛ. Т. IV. Ч. 1 М. 2000. С. 413.
В лето 6954 (1446)
… Тои же зимы князь великии Василеи насла Татар два царевича на Литовьскии городы, на Вязму и на Брянеск, и на иныи городы безвестно, и много потратиша, и в полон сведоша и пожгоша, мало не до Смоленьска. И. то слышав князь Литовьскии Казимир, и посла своих панов и расть свою на Можаеск и на иныи городы, 5 городов взя, и плени земли много и повоева, и крестьяньству погибель велика бысть. ПСРЛ. Т. IV. Ч. 1 М. 2000. С. 440.
В лето 6954 (1446)
… Того же лета князь великии събра вои, и поиде на того же Махмета, и прииде к Суздалю; и бывшю ему оу Ефимьева манастыря, и безвестно наидоша Татарове, и бысть им сеча велика, князю великому с Татары; … а князь Иван Андреевичь и князь Василеи Ярославличь, а иныи ранены, в мале дружине оутекоша. ПСРЛ. Т. IV. Ч. 1 М. 2000. С. 442.
В лето 6955 (1447).
… Тои же зимы сдумавше три князя, князь Дмитрии Юрьевичь, князь Иван Можаискии, князь велики Тферьскии Борис Алексанлврочиь, изымаша князя великого Василиа Васильевича московьского, ослепиша его. ПСРЛ. Т. IV. Ч. 1 М. 2000. С. 443.
В лето 6956 (1448).
Князь велики Василеи выбеже во Тферь, и приехаша к немоу князи и бояри и Татари; и слышав князь Дмитрии и князь Иван Можаискии, и выехаша за Волгу в Галичь и на Кострому и на Вологду, и стоаху противу себе о реце о Волге, а Новгородци не въступишася ни по одином. ПСРЛ. Т. IV. Ч. 1 М. 2000. С. 444.
 

В. Окончание списка Голицынскаго.

В лето 6954 (1446).
… Того же лета здоумав три князи: князь Дмитреи Юрьевичь и князь Иван Андреевичь Можаискыи, князь Борис Александровичь Тферскыи, царева посла велели потеряти да и казноу взяли. Того же лета князь Дмитреи Юрьевичь Шемяка да князь Иван Ондреевичь Можаискыи пришли к Москве изгоном, а князь велики оу Троици в Сергиеве манастыре; и князь Дмитреи сел на Москве, а князь Иван, ехав, поимал великого князя оу Троици, и приведшее на Москвоу и выняша оу него очи, февраля. ПСРЛ. Т. IV. Ч. 1 М. 2000. С. 454.
В лето 6957 (1449)
… Тое же весны князь велики бысть на Роудне в Ярославле. Придоша на него князь Дмитреи Шемяка да князь Иван Можаискыи с многыми людми, и в мале не бысть межь ими кровопролитья. Князь же Иван доби челом великомоу князю, и князь велики дал емоу к его очине Бежитцкои Верх, а князь Дмитреи Шемяка поиде к Галичю. ПСРЛ. Т. IV. Ч. 1 М. 2000. С. 455.

 

Г. Окончание списка Академическаго.

В лето 6957 (1449).
… Тое же весны князь велики бысть на Рудине в Ярославле. Пришедша на него князь Дмитреи Шемяка да князь Иван Можаискыи со многими людьми, и в мале не бысть меж ими кровопролитья. Князь же Иван доби челом великому князю, и князь велики дал ему к его отчине Бежицкои Верх. ПСРЛ. Т. IV. Ч. 1 М. 2000. С. 463.
В лето 6964 (1456).
Князь великии Василеи Василиевичь Можаиск взял, а князь Иван Андреевич к Литве побежал. ПСРЛ. Т. IV. Ч. 1 М. 2000. С. 464.

 

Е. окончание списка Дубровскаго.

В лето 6957 (1449)
… Тое же весны бысть князь великии на Рудневе во Ярославле. Пришедше на него князь Дмитреи Шемяка да Иван Можаискыи с многими людми, и в мале не бысть межь ими кровопролития. Князь же Иван добил челом великому князю, и князь великии дал ему к его отчине Бежецкои Верх. А князь Дмитреи Шемяка поиде к Галичю. ПСРЛ. Т. IV. Ч. 1 М. 2000. С. 490.
 

Духовная грамота великого князя Василья Васильевича.

… Да даю своему сыну Ивану … да Колугу и с Олексиным и с волостьми и с путьми и с селы и со всеми пошлинами, как было за князем Иваном за Можаиским. … Да даю же сыну своему Юрью Можаеск с волостьми и с путьми и с селы и со всеми пошлинами, и с Медынею и что к Медыни потягло; да Серпухов; да Хотунь с всеми пошлинами. ПСРЛ. Т. IV. Ч. 1 М. 2000. С. 494.
В лето 6989 (1481)
… Тогда же князь велики братию свою пожаловал, прият в доскончание: князю Ондрею Болшому дасть Можаеск, а князю Борису отступися сел его. ПСРЛ. Т. IV. Ч. 1 М. 2000. С. 524.
В лето 7034 (1526)
… Того же лета, месяца февраля 26, на память святаго отца Перфириа епископа Газска, нарекоша на Москве в Новъгород владыкои архимандрита Макариа из Мужаиска из Лушков, на второи недели поста, в понедельник. ПСРЛ. Т. IV. Ч. 1 М. 2000. С. 613.
А се имена всим градом Рускым, далним и ближнимь.
… Литовскии: … Масалеск ….
… Можаеск, …
ПСРЛ. Т. 4 Ч. 1. М. 2000. С. 624.

 

Псковские летописи.

В лето 6954 (1446).
… И князь великии Дмитреи Юриевичь Шемяка со князем Иваном Можаиским пришедши, в Москву засяде, а князя Ивана Можаиского посла в Маковець. Иван же князь шед тамо князя великаго Василия Василиевича поима на мясное заговение в неделю, а на Москву приведе в понеделник на сырной неделе, а на четвертыи день князь великии Дмитреи Юриевичь Шемяка повеле его слепити, и выняша оу него очи; а сам сяде на княжении великом на Москве. ПСРЛ. Т. V. Вып. 1. М. 2003. С. 47-48.
В лето 6954 (1446).
... И князь великои Шемяка Георгеевич с князем Иоанном Можаискым, пришед, Москву засяде, а князя Иоана послаша в Маковець. И шедши Иоан тамо князя великого Васильа Васильевича поима на мясное заговение, а на Москвоу приведе в понеделник на сырнои недели, а на 4 день князь великои Дмитреи повеле его слепити, и выняше оу него очи; а сам седе на княжении великом на Москви. ПСРЛ. Т. V. Вып. 2. М. 2000. С. 136-137.
В лето 7032 (1524).
… Тоя же зимы, в великии пост, взял князь великии из Можаиска архимандрита Макарья, и постави его архиепископом в Великии Новгород, и да емоу всю казноу старых архиепископов, и бояр емоу своих дал; и присла архиепископ с Москвы в Великии Новгород и Псков, а велел в октеньях молити бога и пречистеи его богоматере, и чюдотворцов о государе нашем великом князи Василье Ивановиче и его благовернои княгине Елене, чтобы господь бог дал им плод чрева их. ПСРЛ. Т. V. Вып. 1. М. 2003. С. 103.
В лето 7041 (1533).
… А мор бысть тоую всю осень во Пскове; и присла князь великии во Псков к своим дьяком, к Четвертки к Терпигореву, да Колтыре Ракову, и к Иваноу Шамкомоу, и повеле им князь великии из своеи казны церковь поставити обыденную, кои храм миру оугожь; и паде жребеи на святого архистратига Гаврила, и поставиша церковь святого Гаврила у Михаиловских ворот, на Обакумове дворище Можаича сведена, против дьяских дворов, и поставиша и освяща ю в день един, месяца декабря в 14; а оуже поветрие преставает. ПСРЛ. Т. V. Вып. 1. М. 2003. С. 105.

 

Софийская первая летопись старшего извода.

В лето 6895 (1387).
В купе же си лета сбираются. … Дмитреевых Ивановича детеи: князь великии Василеи, Юрии, Андреи, Петр, Иоан, Костянтин, 1 Данило. ПСРЛ. Т. VI. Вып. 1. М. 2000. С. 18-19.
В лето 6739 (1231).
… Того же лета князь Ярослав ходи ратью к Чернигову на князя великаго Михаила и пожже Шернеск, и стояв под Можаиском, възвратися въсвояси без мира, а города не взяша. ПСРЛ. Т. VI. Вып. 1. М. 2000. С. 286.
В лето 6849 (1341).
Княжение великаго князя Семеона Ивановича Московьскаго.
… Того же лета приходи рать литовьская к Можаиску, но города не взяша, а посад пожгоша. ПСРЛ. Т. VI. Вып. 1. М. 2000. С. 413.
В лето 6890 (1382).
О Московьском взятии от царя Тактамыша и о пленении земли Русскыя.
… И елма же царь распусти вои по всеи замли Рускои воевати княжение великое, ови шед к Володимерю, много людии посекоша и в полон поведоша, а инии ходиша ко Звенигороду, а инии к Можаиску, а друзии к Волоку, а инии к Переяславлю и взяша его, и огнем пожгоша, а граждане выбегши на озеро в судех и тамо избыша, а град повергше, а инии к Юрьеву. И мнозии гради плениша, а крестьян посекоша, а иных в полон поведоша, а села и манастыри, и церкви святыя огнем пожгоша, волости повоеваша, и много зла створиша земли Русскои. ПСРЛ. Т. VI. Вып. 1. М. 2000. С. 481-482.
В лето 6897 (1389)
. ... О житии и о преставлении великаго князя Дмитрия Ивановича царя рускаго.
... И раздавал есть сыном своим городы своея отчины по части, не чем им есть княжити, и землю им раздели по жребию. … Третиему сыну своему князю Андрею дал есть город Можаеск и другыи город со всеми волостьми и с пошлинами Белоозеро, се же было неколи княжение Белозерьское. ПСРЛ. Т. VI. Вып. 1. М. 2000. С. 500-501.
В лето 6906 (1398).
… Того же лета приеха в Новъгород Великии князь Андреи Дмитриевич, брат великаго князя Васильа. ПСРЛ Т. VI. Вып. 1. М. 2000. С. 515.
В лето 6921 (1413).
Створися знамение в отчине князя Андрея Дмитриевича от Можаиска за 15 верст, от иконы святыя Богородица явилося людем много прощения, слепым, хромым и раслабленым, и глухим, и иным многым исцеление бысть, иже не можеть ум человечь сказати, колико человеколюбие божие и какова милость божия на людех. ПСРЛ. Т. VI. Вып. 1. М. 2000. С. 535.

 

Софийская вторая летопись.

В лето 6906 (1398).
… Того же лета новугородци послаша к великому князю бити челом посадника Якова Захарьича и тысятьцкаго Онанию Костянтиновича со многи дары, пожаловал их, дасть им мир, посла им в себя места брата князя Андрея, а во Пьсков Ивана Всеволодича Тферьскаго. ПСРЛ. Т. VI. Вып. 2. М. 2001. С. 3.
В лето 6911 (1403)
… Тое же осени женися князь Ондреи Дмитреевичь у князя Александра Патрекеевичя на Москве и поя дщерь его Огрофену. ПСРЛ. Т. VI. Вып. 2. М. 2001. С. 11.
В лето 6916 (1408)
… О Едигееве рати. Тое же зимы князь некии именем Едигеи повелением царя Булат Салтана прииде на Рускую землю, … То же слышав князь велики, иде на Кострому, а на Москве остави князя Володимера Ондреевича и братию свою Андрея и Петра, и князя Ивана Юрьевича, с ними же многое множество народа людеи. Посад же весь пожгоша сами. … А в осаде тогда седели на Москве князь Володимер Андреевич, князь Андреи Дмитреевич, князь Иван Юрьевич. ПСРЛ. Т. VI. Вып. 2. М. 2001. С. 29-30.
В лето 6921 (1413).
Бысть прощения от иконы в Можаисце от Пречистыя за 15 веръст от Можаиска в Колоче, с нею же Лука ходил и поиде к Можаиску. И срете его князь Андреи Дмитреевич и весь народ со кресты. Оттоле прииде в прочая грады, и сретаху князи и боляре, и все христьянство з дары и с великою честью. И возрадовася вся земля и бысть прощения, хромыя и слепыя, болныя, разслабленая исцеления приимаху, ум человечь не может изрещи милости божиа. ПСРЛ. Т. VI. Вып. 2. М. 2001. С. 39.
В лето 6933 (1425).
… Того же лета князь Юрьи поиде к Новугороду Нижнему, и князь велики посла за ним князя Ондрея Дмитреевича, а с ним силы полтретьяцать тысящь. И князь Ондреи, брат не дошед, воротися. ПСРЛ. Т. VI. Вып. 2. М. 2001. С. 51-52.
В лето 6939 (1431)
… Того ж лета преставися митрополит Фотеи июля 1 и положен на Москве в церкви Святыя Богородицы честнаго ея Успениа. Написа тако же грамоту преже преставлениа к богу чюдну по образу преждь сего бывшаго Киприана митрополита.
… Такоже и о Святем Дусе возлюбленным сыном нашего смирениа благородным и благоверным князем князю Ондрею Дмитреевичю и князю Костянтину Дмитреевичю, тако же даю благословение и прощение, и мир в сии век и в будущии, и с их княгинями и детьми. ПСРЛ. Т. VI. Вып. 2. М. 2001. С. 54, 59-60.
В лето 6940 (1432).
Преставися князь Ондреи Дмитреевич Можаискии июля 9 и положен бысть на Москве в церкви Архангила Михаила на площади. ПСРЛ. Т. VI. Вып. 2. М. 2001. С. 64.
В лето 6951 (1443).
… Тое же весны князь Иван Ондреевич поимал Андрея Дмитреева, и жену его Марью сжег на Мироносици в Можаисце. ПСРЛ. Т. VI. Вып. 2. М. 2001. С. 103.
В лето 6953 (1445).
Прииде литовьская рать на Русь в семи тысящях, и взяли с города с Колуги окуп, а под Козельском стояли неделю. Князь Михаило Ондреевичь Можаискои болен бе тогда, но слышав, посла на них в треюсот человек воеводу, и пришедше на них, погнаша их. ПСРЛ. Т. VI. Вып. 2. М. 2001. С. 103.
В се же в лето 6953-е (1445).
… О суздольском бою и о нятии великого князя Василья Васильевича. Тое же весны прииде весть к великому князю, что отпустил на него царь детеи своих Маматека да Егупа. И князь же велики, заговев Петрова говеина, поиде с Москвы противу ему, пришедше же ему в Юрьев, и ту прибегоша к нему воеводы ноугородцкии, князь Федор Долголядов да Юшка Драница, град же зжегши, понеже изнемогоша з голоду. Взяв же князь велики Петров день в Юрьеве, поиде к Суздалю, а пришли к нему братиа его князь Иван Ондреевичь, да брат его князь Михаило, да князь Василеи Ярославич с малыми людьми, и пришед, близ Суздаля сташа на реке на Каменке июля в 6, вторник. … Вышедшим же им на поле близ Еуфимьева манастыря по левую сторону, и ту сретошася с окаянными агаряны, бе же их множество много пред крестьяньскими полки. … А князя Ивана Ондреевичя, ранивше и много, и с коня збиша, и поддан бысть ему другии конь, он же утече.
… ПСРЛ. Т. VI. Вып. 2. М. 2001. С. 104-105.
В лето 6954 (1446).
… А князю Дмитрею Шемяке вложи дьявол в мысль хотети великаго княжениа, и начат посылати ко князю Ивану Можаискому с тем, что, рекши, «царь на том отпустил великого князя, а он царю целовал крест, что царю седети на Москве и на всех градех руских, на наших вотчинах, а сам хощет сести во Тфери». И тако по дьяволю научению обьсылающися и здумавши сии своими злыми советьники, иже тогда быша у них Костянтиновичи и прочии бояре их, не хотяще добра своим государем со предиреченными речьми к великому князю Борису Тферьскому, он же слышав то и убояся, и бысть единомысленик с ними. Мнози же с ними от москвич в думе, Иван Старков и бояре, и гости, беша же и от черньцов в тои думе с ними. И тако начаша князи с своими советники безвесто вооружатися и искати подобна времени, как бы изгонити великаго князя. Усмотрив таков получаи подобен их злому совету, восхотевшу великому князю ити и поклонитися живоначалнои Троици и мощем чюдотворца Сергиа. Пошедшу же ему с своими благородными чады со князем Иваном и Юрием и с малыми зело людьми, ничто же иного чая, но токмо накормити тамо сущюю братью великоа тоя лавры. А ко кънязю Дмитрею Шемяке и Ивану Можаискому вести по вся дни посылаеми бяху с Москвы от изменников, а они сувокупившися стояли в Рузе, готови суще, яко пси на лов и яко дивии зверие, хотяще насытися крови человече. Бывши же им вести тои, что князь велики изыде из града, они же часа того поидоша изгоном к Москве и приидоша февраля месяца 12 день, в субботу, в 9 час нощи противу недели, иже о Блуднем, и взяша град, не бяше бо в нем противящегося им. И никому ведущу сего, токмо единомысленником их, иже и град отвориша им. Они же вшед во град, великих княгинь изнимаша, Софию и Марию, и казну великаго князя и матери его разграбиша, а бояр, сущих ту, изнимавше и пограбиша. И тоя же паки нощи отпускает князь Дмитреи князя Ивана Можаискаго на великаго князя Василья ко Троици изгоном со многими людьми своими и с его. В самую же литургею пригонил в неделю о Блуднем, Бунком зовут, к великому князю, поведая ему, что идут на него князь Дмитреи Шемяка да князь Иван Андреевичь Можаискыи ратью. И не ят ему веры, понеже тот Бунко за мало преже того отъехал ко князю Дмитрею, и рече: «Сии смущают нас, а яз своею братьею в крестном целовании, то како может то быти так?». И повеле того с манастыря сбити и назад воротити его, и яко бывшу тому на Вори, яша его ратнии сторожи и биша его. А князь велики хотя не имя ему веры, а единако посла сторожи к Радонежю. Они же пришед, сташа на горе над Радонежем стеречи. И позна их ратнии сторожи издалеча, а сии тех ратных не усмотриша, а не имяху веры тем вестем. А те сторожи сказаша князю Ивану, что есть сторожа за Раонежем на горе. Они же повеле сани многие изрядити как возы с рагозинами, а инии с польстьми, а в них по два человека в доспесех, а третеи после идет как бы за возом, и как переднии уже минуша их, и таковы скакаша вси ис санеи и изнимаша их, а убежати им некако бяше, понеже бо тогда снег бясть 9 пядеи. И тако воскоре поидоша к монастырю, и как явишася скачюще на конях з горы тоя к селу Клеменьтеевьскому, яко же на лов сладок, и яко увидев их князь велики, потече сам на конюшоннои дворець, а не бе ему коня уготованна, сам бо се яко ложь вмени, надеяся на крестное целованиа и не повеле себе ничего уготовити, а люди вси во унынеи быша и в оторопе велице, яко изумлени. Видев же князь велики яко несть ему помощи ниоткуду, скоро поиде на монастырь ко церкви святыя Троици каменые. Понамарь же именем Микифор инок притек скоро и отомче церковь, князь же велики вниде, и он замъкнув его, схоронися, а они убиица, яко же свирепии волци возгониша на монастырь на конех. Преже всех Микита Костянтинович на лествицю на кони к предним дверем церковным, и ту пошедшу ему с коня и заразишась о камень, иже пред дверми церковными возделан на примосте, и притекши прочии, взяша его, он же едва отдохнув и бысть яко пьян, а лице его яко мертвець бе. Потом же и сам князь Иван возгони на монастырь и все воиньство их, и начат въспрашати князь Иван, где князь велики. Князь же велики внутре церкви услыша князя Ивана глаголюща и возопи велми, глаголя: «Брате, помилуите мя, не лишите мя зрети образа Божиа и пречистая матери его и всех святых его. Не изыду из манастыря сего и власы главы своея зде остригу». И шед ко дверем южным, отопре их сам и взят икону на гробе святаго Сергиа Явлениа святыя богородица с двема апостолома святому Сергию, и срете князя Ивана в тех жо дверех церковных, глаголя: «Брате, целовали есмя животворящии крест и сию икону в церкви сеи живоначалныя Троица у сего же чюдотворцава гроба Сергеева, яко не мыслити нам, ни хотети ни которому же от братьи никоего лиха. А се ныне не вем, что сбыстся надо мною». Князь Иван рече к нему: Господине государь, аще ти восхощем коего лиха, буди то над нами лихо. Но се сотворихом христьяньства ради и твоего окупу, видев же бо ся татари, пришедши с тобою, облегчат окуп, что ти царю давати». Князб же велики поставль икону на место свое и паде ниць у гроба чюдотворцава Сергиева, слезами обливая себе и велми воздыхая кричанием, моляся захлипаеся, яко удивитись всем сущим ту и слезы испустити, и тем злодеем противным. А князь Иван мало покланись во церкви, изыде, рек Миките: «Возмите его». И князь велики много помолився отчаяниа своего и возрев, рече велми: «Где брате Иване?» Приступныи же злыи раб горкых немилостивых мучитель Никита и ят за плече великаго князя, глаголя: «Поиман еси богом и великим князем Дмитреем Юрьевичем». Оному же рекше: «Воля божиа да будеть». Он же злодеи вывед его из церкви и с манастыря сведе, и посадиша его в голые саны, а противу его черньца. И тако и отъидоша с ним к Москве, а бояр его всех пограбивше, нагих попущахша, а сынове великого князя князь Иван да князь Юрии ухоронишась в том же манастыре, а они, кровопиици, яко же некоторыи сладкии лов уловивше, и отъидоша, а о сих небрегоша, ниже пытаху о них. Сии же великого князя сынове Иван, Юрии в ту же нощь побегоша из манастыря со оставльшими с ними людьми и ухоронишася, и прибегоша ко князю Ивану Ряполовьскому в Юрьев в селе его в Бояркова. Князь же Иван с своею братьею с Семеном и Дмитреем и со всеми людми своими бежаша с ними к Мурому и там затворишася со многими людьми. А князя великаго Василиа в понеделник на ночь на Мясопускънои недели февраля 14 приведоша на Москву и посадиша его на дворе Шемякине, а сам князь Дмитреи Шемяка стоял на дворе Поповкине, в среду на тои же недели на нощь ослепиша князя великаго и отслаша его на Углече Поле и с его княиняю Марьею, а матерь его великую княиню Софью послаша на Чюхлому. … А князь Дмитреи Шемяка видя то, что про великаго князя мнози люди отступают от него, и разосла по владыкы, и начат думати со князем Иваном и со владыкыми, и с бояры, выпустити ли или ни.
… ПСРЛ. Т. VI. Вып. 2. М. 2001. С. 108-113, 116.
В лето 6955 (1447).
Слышавши же то бояре князя великаго и дети боярьские, и людие мнози, побегоша от князя Дмитрея и от князя Ивана к великому князю. … А князь Дмитреи Шемяка и князь Иван Можаискаи еще стояли тогда на Волоце. … Наместник же княжь Дмитреев Федор Галичскои от Пречистые от заутрени убежа, а княжа Иванова намесника Василиа Чешиху, бежаща из града на кони, изнимал истобничишка великие княгини, Ростопчею звали, и приведе его к воеводам, и окаваша его. А прочих княж Дмитреевых и княж Ивановых имающе, грабяху и коваху, а гражан приведоша к целованью за великаго князя Василиа, а град начаша крепити. А князь велики поиде к Волоку на Шемяку и на Можаискаго со многою силою. Они же в недоумении бывше, се от Тфери на них князь велики идет, а се придет к ним весть, что царевичи идут да князь Василеи Ярославичь со многою же силою, а Москва уже взята, а от них люди единака бежать, и тако побежаша к Галичю, а оттоле на Чюхлому
… ПСРЛ. Т. VI. Вып. 2. М. 2001. С. 118, 120-121.
В лето 6962 (1454).
… Того же лета ходил князь велики Василеи Васильевич ратью ко граду к Можаиску. То слыша, князь Иван Ондреевичь побежал в Литву, а князь велики Василеи Васильевич град пленил и намесников посади в нем, и возвратися.
… ПСРЛ. Т. VI. Вып. 2. М. 2001. С. 127.
В лето 6970 (1462).
… князь велики … преставися марта 27 … Дасть великое княжение сыну своему князю Ивану Васильевичю, а князю Юрью Дмитров да Можаеск, да Серпохов, да Хотунь,
… ПСРЛ. Т. VI. Вып. 2. М. 2001. С. 158.
В лето 6978 (1470).
… Тое весны послал рать свою князь велики на казанские места, по Велице дни на другои неделе, и судовая рать под Козань пришла маия в 21, … дмитровцы и мажаичане, и углечане, и ярославцы, ростовцы, костромичи и прочии все поволжане Волгою к Нову же городу на один срок.
… ПСРЛ. Т. VI. Вып. 2. М. 2001. С. 165-166. В лето 6986 (1478)
… выиде князь велики с Москвы к Новугороду за их преступление казнити их воиною … А со князем Борисом можаичи и волочане, и звенигородци, и ружане, кои служат великому князю. … да на том же стану на Полинах князь велики полки урядил, учинил, которому где бытии. … а у себе в полку велел бытии князь велики … князю Борису Михаиловичю Оболенскому с можаичи и с волочаны, и звенигородци, и с ружаны.
… ПСРЛ. Т. VI. Вып. 2. М. 2001. С. 255, 257, 259-260.
В лето 6988 (1480).
… Тогда царь убояся и с татары побежа прочь ноября 11. …и слыша князь велики, посла опытати, еже и бысть. И приехаша к нему братья его, он же смирися с ними и дасть князю Ондрею Можаеск, а князю Борису села Ярославичевы все делярные.
… ПСРЛ. Т. VI. Вып. 2. М. 2001. С. 309.
В лето 7008 (1500)
… после того апреля же прислали к великому князю Ивану Васильевичю бити челом князь Василеи княж Иванов сын Дмиреевичя Шемякин да князь Семен княж Иванов сын Ондреевича Можаиского, что на них пришла велика нужа о греческом законе и государь бы их пожаловал, взял к себе и с вотчинами. И князь великии Александр Литовскыи и в ынех делех по докончанью не исправил. И князь велики Иван Васильевич всея Руси тое для нужи князя Семена и князя Василья принял в службу и послал о них с отказом Ивана Телешова, а с розметною послал к великому князю Александру Офонасья Шеенка вязьмитина. А ко князем послал воеводу боярина своего Якова Зхарьича и иных своих воевод со многими людьми. И Яков Захарьичь пошел с Москвы маиа в 3-ю неделю, и пришед в Литовскую землю, городок Дбрянеск взял, а воеводу и наместника дбрянского пана Станислава Браташевича поимал и владыку дбряньского поимал же и послал их к великому князю на Москву. И оттоле пошол Яков Захарьичь ко князем и привел их к крестному целованью на том, что им государю служити великому князю Ивану Васильевичю и с своими отчинами.
… ПСРЛ. Т. VI. Вып. 2. М. 2001. С. 362.

 

Летопись по Воскресенскому списку.

В лето 6785 (1277).
… Того же лета князи вси поидоша в орду: князь Борис Ростовский Василковичь со княгинею и с детми, и брат его Глеб с сыном Михаилом, и князь Феодор Ростиславичь Ярославский, внук Мстиславль Давыдовича Смоленскаго. Сице же глаголеть о нем яко сего братьа его, Глеб, Михайло, изобидиша, даша же ему един Можаеск; седящу же ему в нем, а в то время во Ярославли бе княгини Васильева Всеволодича внука Костянтина Ростовского со дщерью, сей же женися у нее, и того ради достася ему Ярославль.
… ПСРЛ. Т. VII. М. 2001. С. 173.
В лето 6801 (1293).
Князь Андрей Александровичь иде в орду и с инеми князи Рускыми, и жаловася царю на брата своего на великого князя Дмитриа Александровича; царь же отпусти брата своего Дедюню со множством рати на великого князя Дмитриа Александровича. Они же пришедше много пакости учиниша християном, и много градов поимаша: Володимерь, Суздаль, Муром, Юрьев, Переаславль, Коломну, Москву, Можаеск, Волок, Дмитров, Углече поле, а всех градов взяша 14, и всю землю пусту сотвориша; а князь великий Дмитрий Александровичь беже во Псков. Татарове же поимавше прежереченныя грады, и восхотеша ити на Тверь
… ПСРЛ. Т. VII. М. 2001. С. 180.
В лето 6811 (1303).
… Тое же весны князь Юрьи Даниловичь со братьею своею ходи к Можайску, и Можаеск взя, а князя Святослава изнима и приведе его на Москву. … ПСРЛ. Т. VII. М. 2001. С. 183.
В лето 6849 (1341).
… Того же лета приходи рать Литовскаа к Можайску, и пожгоша посад, а города не взяша. … ПСРЛ. Т. VII. М. 2001. С. 206.
Оглавления и статьи, помещенныя перед летописью по Воскресенскому списку.
27. … О взятьи Можайска. … ПСРЛ. Т. VII. М. 2001. С. 220.
51. И о взятье Мосальска. … ПСРЛ. Т. VII. М. 2001. С. 221.
Начало главам и о повести временных лет откуды пошла Рускаа земля.
41. В лето 6961. … И о побеге князя Ивана Можайскаго в Литву.
… ПСРЛ. Т. VII. М. 2001. С. 226.
Уделние князи Московские.
… А от великого князя от Дмитреа от Ивановича от Доньского дети, на удел которые пошли: князь Юрьи на Галичь, князь Ондрей на Можаеск, а женился у князя Александра Патрикеевича у Стародубьскаго, князь Петр на Дмитров, бездетен, князь Костянтин на Углечь, а у него сын князь Семен. … А у князя у Андреа у Дмитреевича у Можайского дети князь Иван, побежал в Литву, да князь Михайло Ондреевичи. А у князя у Ивана у Андреевича дети князь Ондрей да князь Семен Стародубьской; а у князя у Андрея у Ивановича сын был князь Феодор, а убили его Брянчане; а у князя у Семена у Стародубьского сын был князь Василей Семеновичь, а была за ним своякиня великого князя Васильева.
… ПСРЛ. Т. VII. М. 2001. С. 238.
А се имена градом всем Русскым, далним и ближним.
А се грады Литовские: … Мосалеск, …
А се грады Залесские: … Можайск, …
ПСРЛ. Т. VII. М. 2001. С. 240-241.

 

Продолжение летописи по Воскресенскому списку.

Оглавление второй половины летописи по Воскресенскому списку, находящееся в Парижской рукописи.
В лето 6940 (1432)
… О преставлении князя Андрея Дмитреевича.
… ПСРЛ. Т. VIII. М. 2001. С. 2.
В лето 6961 (1453)
… И о побеге князя Ивана Можайского в Литву.
… ПСРЛ. Т. VIII. М. 2001. С. 2.
В лето 6890 (1382).
О московском взятии от царя Тактамыша и о пленении земля Рускиа.
… Елма же царь распусти вои по всей земли Руской воевати княжение великое, овии шедше к Володимерю много людей посекоша и в полон поведоша, а инии ходиша к Звенигороду, а инии к Можайску, а друзии к Волоку, а инии к Переаславлю – и взяша его и огнем пожгоша, а гражане выбегоша на озеро в судех и тамо избыша, а град повръгше, а инии к Юриеву шедше пограбиша и пожгоша, а христиан посекоша, а иных в полон поведоша, а села и монастыри и церкви святыя огнем пожгоша, волости повоеваша, и много зла сътвориша земли Руской.
… ПСРЛ. Т. VIII. М. 2001. С. 47.
В лето 6897 (1389).
… О житии и о преставлении царя Рускаго, великого князя Дмитриа Ивановича.
… Призвав же первие сына своего князя Василиа болшаго на старейший путь, предасть в руце его великое княжение, еже есть стол отца своего и деда и прадеда, с всеми пошлинами; дал есть ему отчину свою землю Рускую, и раздавал есть сыновом своим городы своеа отчины по частем, на чем им княжити, и земли им роздели по жеребьем. Второму сыну своему, князю Юрью, дал есть город Звенигород с всеми пошлинами и Галичь, иже неколико было княжение Галичьское, с всеми волостми и с пошлинами; а третиему сыну своему дал, князю Андрею, Можаеск и другий город Белозеро с всеми волостми и с пошлинами, се же было неколи княжение Белозерское; четвертому сыну своему, князю Петру, дал есть город Дмитров с всеми волостми и с пошлинами – и тако утверди златопечатаною грамотою.
… ПСРЛ. Т. VIII. М. 2001. С. 56-57.
В лето 6916 (1408).
… Того же лета мор бысть на люди по многым странам коркотою: в волостех Ржевскых, Можайскых, Дмитровьскых, Звенигородскых, Переславьскых, Володимерскых, Юриевьскых, Рязаньскых, Торускых, было же инде в Московскых волостех.
… ПСРЛ. Т. VIII. М. 2001. С. 82.
О Едигее.
… Тое же зимы некоторый князь ординский, именем Едигей, повелением Булата царя, прииде ратью на Рускую землю, а с ним 4 царевичи да мнози князи Татарские. … Стоя же Едигей у Москвы, в селе Коломенском … Град же Москва в печали велице бысть вои обстоим, а людие в нем затвориша, посад же около его сами пожгоша, боящеся примета; в град бо бяше затворилися с ними: князь Володимер Андреевичь, князь Андрей Дмитреевичь, и брат его князь Петр, и князь Иван Юриевичь, и мнози бояре с ними, и епископи, и весь священнический чин и многое множество народа тмочислено, от многых бо град и стран збегошася твердости ради градные
… ПСРЛ. Т. VIII. М. 2001. С. 82-83.
О иконе Пречистыя, с нею же ходи Лука.
В лето 6921 (1413).
От Можайска за 15 верст, в отчине князя Андрея Дмитреевича, явися знамение в Колочи: некий человек, именем Лука, простълюдин сый, прииде ис Колочи к Можайску с иконою святыя Богородица, дръжащи на руце младенец Господа нашего Исуса Христа, с еднну же страну иконы тоя на затворце Никола чюдотворець, а з другую Илиа Пророк, от нея же многа и различна исцелениа быша, и акоже приближися к граду, и срете ю весь град, даже от малых и до великых и до ссущих млеко; оттоле же поиде к Москве, такоже и по иным градом, и сретахуть еа с кресты митрополити, епископи и весь священнический чин, такоже и князи, и княгини з детми, и боляре, и вси велможи и все православное множество христианское, чюдес ради бываемых от нея; мнози бо слепии и хромии, разслаблении и глусии, и вси недужнии с верою пришедше и здрави быша, елико не может ум человечь изрещи такова человеколюбиа Божиа и милости его на нас грешных.
… ПСРЛ. Т. VIII. М. 2001. С. 86-87.
В лето 6933 (1425).
… Князь же великий с отцем своим Фотием митрополитом, и с материю своею великою княгинею Софиею, и с дядями своими князем Андреем и Петром и Костянтином Дмитреевичи, обосла же ся тогда и с братом своим, и дедом великим князем Литовским Витофтом, и с всеми князи и бояры земли своея здумаша послати к князю Юрию отца своего Фотиа митрополита; он же ни мала отречеся, но вскоре и с радостию поиде к нему в Галичь о миру того же лета.
… ПСРЛ. Т. VIII. М. 2001. С. 92.
В лето 6937 (1429).
Приходиша Татарове к Галичю, града не взяша, а волости повоеваша; на Крещении же приидоша изгоном на Кострому, и попленше ю отъидоша на низ Волгою. Князь же великий посла за ними дядь своих князя Андрея и Костянтина, и с ними Ивана Дмитреевича с своими плъки, и доидоша же до Нижнего Новагорода, и ту не угонивши их възвратишася.
… ПСРЛ. Т. VIII. М. 2001. С. 94-95.
В лето 6940 (1432).
… О преставлении князя Андрея Дмитреевича. Того же лета преставися князь Андрей Дмитреевичь в Можайце; и превезше его на Москву, положиша и в Архаггеле.
… ПСРЛ. Т. VIII. М. 2001. С. 96-97.
В лето 6942 (1434).
… Князь Юрий поиде на великого князя з детми своими. А князь Юрий приде в Галичь, и начат съвокуплятися на великого князя, и събрав силу многу и Вятчан приведе, и поиде на великого князя тоя же весны, а с ним дети его, князь Василей да два князя Дмитреа Шемяка да Красной, с многою силою; князь же велики слышав то, поиде противу ему, а с ним князь Иван Можайской; и сретошася в Ростовской области у Николы святаго на горе, в суботу Лазареву, и бысть бой межи их, и одоле князь Юрий; а князь велики побеже к Новугороду Великому, а князь Иван Можайской к Твери, тамо бо и мати его, бежала к Твери к дочери своей. А князь велики послал к князю Ивану Ондрея Голтяева, чтобы от него не отступал, а был бы с ним заодин; князь же Иван отказа с Андреем, глаголя к великому князю: «господине государь! где ни буду, а везде твой есмь человек, но чтобы ныне отчины не потерять, а матка бы не скиталася по чюжей отчине, а всегды есми твой.» князь Юрьи присла к нему Якова Жестова, зовя его к себе; князь же Иван поиде с Твери к князю Юрию, и срете его у Троици, поиде с ним к Москве. Прииде же князь Юрьи под город на Страстной недели в среду, и стоя под городом неделю, а в среду на Светлой недели город взят, и княгинь великих поимав посла в Звенигород, и седе на великом княжении.
… ПСРЛ. Т. VIII. М. 2001. С. 98.
В лето 6944 (1436).
… Тое же весны князь Василей Юрьевичь поиде с Устюга на великого князя, похваляся, а с ним Вятчане, да двор брата его княже Дмитреев Шемякин с ним же; а князь велики събрався срете его у святаго Покрова в Скоротине, в Ростовской области, а с великим князем князь Дмитрей меншей да князь Иван [Андреевичь] Можайской с полки своими, да тогда же к нему приеха служити из Литвы князь Иван Баба Дрютских князей, и той изрядив свои полки по Литовски, такоже и вси прочии плъци князя великого изрядишася по своему обычаю вскоре. Князь бо Василий въсхоте искрасти великого князя, прислал бо к великому князю и взя перемирие до утрея; князь же великий взя перемирие, плъки распусти, и вси разъехашяся кормов деля; а князь же Василей таки поиде того же дне, хотя изгонити великого князя. А к великому князю сторожи прибегоша, поведаша что князь Василий идет на него спешачи; князь же велики розосла по всем станом, а сам похватив трубу начат трубити. И тако часу того събрашяся плъци великого князя, и поидоша вместо съпротивными, и тако сразишася, погониша князя Василиа и полки его; угони же князя Василиа Борис Тоболин, и познав ят его, и начат въпити, и того часа пригна к нему князь Иван Баба, и поимавше князя Василиа приведоша к великому князю; князь же великий посла его на Москву, и ослеплен бысть князь Василей Юрьевичь.
… ПСРЛ. Т. VIII. М. 2001. С. 99-100.
В лето 6951 (1443).
… Тое же весны князь Иоан Андреевичь поимал Андрея Дмиреевичя и жену его Марию зжегл, на Мироносици, в Можайсце. ПСРЛ. Т. VIII. М. 2001. С. 111. О Суходровском бою.
В лето 6953 (1445). Приходи Литва к Колузе: пан Судиивой, пан Подивил Осиковичь, Ондрюшка Мостиловичь, Андрей Исаковичь, Якуб Раловичь, Миколай Немиров, Захариа Ивановичь Кошкин, а рати с ними седмь тысячь, и бывше под Козелском да и под Колугою, да не учинили ничего, и оттоле пришли в Суходров. Слышав же то Можаичи княже Ивановы Андреевича, и събрася их 100 человек детей боярских, а воевода у них князь Андрей Васильевичь Лугвица Суздалского; а княжих Михаиловых Андреевича 100 же голов детей боярских, а воевода у них Иван Федоровичь Судок; а княжих Василиевых Ярославича 60 человек детей боарских на помочь пришли; и сретошася с Литвою в Суходрове, и бысть им бой, и убиша ту воеводу княже Иванова Андреевича Лугвицу, да иных детей боарских княже Ивановых молодых побили; а Степана Яропку да Семена Ржевского поимали, а княже Михаиловых поимали самого Ивана Судока, да с ним детей боярских Филипа Нащокина да князя Иоана Конинского да 5 человек молодых, а Литвы убили 200 человек; а князь велики тогды был и з братьею в Володимери.
… ПСРЛ. Т. VIII. М. 2001. С. 111-112.
О великом князи изымании, как поиман бысть князем Иваном Андреевичем у Троици в Сергиеве Монастыре.
В лето 6954 (1446).
Князю же Дмитрею Шемяке вложи диавол мысль хотети великого княжениа, и начать посылати к князю Ивану Можайскому с тем, что, рекши, царь на том отпустил великого князя, а он к царю целовал, что царю сидети на Москве и на всех градех Рускых и на наших вотчинах, а сам хочет сести на Твери. И тако по дьаволю научению обьсылающися и здумавшеся с своими съветники злыми иже не хотящеи добра своим государем и всему христианству, и посылают с предреченными речми к великому князю Борису Тверьскому; он же слышав то убояся, и бысть единомысленик с ними. Мнози же и от Москвичь в думе с ними бяху, бояре же и гости; бе же и от чернцов в той думе с ними. И тако начяша князи и с своими съветники безвестно въоружатися и искати подобна времени, како бы изгонити великого князя. Усмотрив же сии таков получей подобен их злому съвету, въсхотевшу великому князю итти и поклонитися Живоначялной Троици и мощем чюдотворца Сергиа: пошедшу [же] ему и с своими благородными чады, с князем Иваном и с князем Юрьем, и с малыми зело людми, ничтоже иного чаа, по токмо накормити сущую тамо братью великая тоя лавры; а к князю Дмитрею Шемяке и Ивану Можайскому вести по вся дни посылаеми бяху с Москвы от изменников, а они съвокупившеся стояша в Рузе, готови суще яко иси на лов или яко дивии зверие хотяще насытитися крове человеча. Бывши же к ним вести той, что князь велики изыде из града, они же час�